大家好，我係嚟自香港嘅代表Robin，由今日起會係Asianbeat嘅網站中同大家見面。其實之前一直都有同Asianbeat嘅朋友聯絡，仲一直有係日文部份到寫Blog。當我知道佢哋有繁體字網嘅時候，我就梗係第一時間係到出現啦，因為除咗同日本朋友交流之外，繁體字版仲可以同內地，台灣嘅網民交換意見，正！！

雖然之前係日本版到介紹過自己，不過都係到介紹多一次，我係喺香港電台第二台做DJ，中文名叫白原顥，節目入面專門介紹日本嘅音樂，有好多時仲可以同日本嘅歌手見面做訪問，對於鐘意聽日文歌嘅我嚟講就梗係好事啦。
邊工作邊娛樂。咁當然，除咗同日文有關嘅嘢之外，香港娛樂圈，文化，趣聞，年青人喜好，總之乜都熟，乜都會將佢最抵死嘅全部係呢到同大家分享。若果大家有興趣聽我電台節目嘅話，可以Click上去
http://programme.rthk.org.hk/channel/radio/programme.php?name=Teenschoice&p=2129&m=archive&page=1&item=100 。

香港電台係一個非常之好嘅公型廣播機構，網上可以重溫一年嘅節目，而且仲係唔駛錢添。

係以後嘅文章書寫到我會介紹好多香港嘅人同事，其實其中一樣香港特色文化已經係今次展示咗俾大家睇。
就係100%港式口語寫法，同台式，大陸嘅寫法都有分別。
今次第一次先至係咁寫港式字，下次會少小番小小o家啦，因為可能真係有啲人睇唔明……。
總之，係呢到先同咁多位講聲《多多指教》。下次開始
會有好多真正香港土產嘅精彩內容同大家分享，我哋下次見。

PS：今次內容入面特別加插咗幾張香港電台嘅照片，呢到位於香港嘅九龍廣播道。白原顥